Draumsaga
Draumsaga er nálgun í draumavinnu, þar sem sérstaklega er horft til samspils draumvitundar og vökuvitundar í þeim tilgangi að auka þekkingu á eigin sjálfi, tengjast auðlegðinni sem innra með okkur býr og finna samhljóm milli hennar og umhverfisins. Boðið er upp á örnámskeið, helgarnámskeið, vikunámskeið og draumaferðir til útlanda. Einnig allt að átta mánaða nám í litlum hópum. Uppbygging námsins er samspil fræðslu, umræðu, upplifunar og sköpunar. Leiðbeinendur leggja inn fræðslu og utanumhald, þátttakendur leggja til eigin hugmyndir, drauma og sögu til að vinna úr.
Draumsaga hóf göngu sína sumarið 2017, þegar við dreymendurnir Elísabet Lorange og Valgerður H. Bjarnadóttir, ákváðu að láta draum rætast. Við höfðum báðar unnið með eigin drauma alla tíð og komið að vinnu með drauma annarra árum saman, í einstaklingsvinnu og á námskeiðum. Við leiddum svo saman draumahóp í nokkurn tíma og langaði að taka vinnuna á næsta stig. Haustið 2017 hóf hópur kvenna sunnan heiða vetrarnám í Draumsögu. Þær hittust einu sinni til tvisvar í mánuði og unnu með drauma sína og hverrar annarrar undir handleiðslu Valgerðar og Elísabetar.
Sumarið 2018 voru helgarnámskeið, m.a. á Hólum í Hjaltadal og síðustu vetur hefur starfsemin hér heima aðallega byggst á örnámskeiðum u.þ.b. einu sinni í mánuði, auk draumahópa sem hittast reglulega.
Í janúar 2019 fórum við svo í sannkallaða draumaferð til Lanzarote, þar sem hópur kvenna vann með draumana sína og sögu. Önnur slík ferð var farin í janúar 2020 og svo enn 2022. Í janúar 2023 var hópurinn opinn öllum kynjum og konur og karlar unnu saman með sína drauma.
2024 verður boðið upp á bæði hefðbundið Draumsögunámskeið fyrir öll kyn og Draumsögu kvenhetjunnar fyrir konur.
Ýmis styttri námskeið og draumahópar eru í boði veturinn 2023 - 24.
Sjá fréttir hér um einstaka viðburði og einnig https://www.facebook.com/draumsaga/ og viðburðina sem finna má þar.